Тајванското министерство за одбрана извести дека во текот на овие два дена, во Тајванскиот теснец биле забележани 58 кинески авиони и девет воени бродови
Кинеската државна телевизија објави дека патролите и вежбите за инспекција на борбена готовност околу Тајван ќе продолжат и утре, а денешните вежби имале за цел да симулираат заеднички прецизни напади врз клучни цели на островот Тајван и во околните морски области. Тајвански безбедносни извори за Ројтерс велат дека покрај симулацијата за напад на островот, кинеската армија вежбала и симулирани напади врз борбени групи на носачи на авиони, како и вежби за војување против подморници.
Инаку, кинески воени бродови вчера почнаа со вежби со боева муниција како дел од тридневната воена вежба која Кина ја нарекува „предупредување“ за протајванските сили за независност.
Овие вежби започнаа само неколку часа откако претседателката на Тајван, Цаин Инг-вен, се врати од патувањето во САД, каде што таа имаше состанок со претседателот на Претставничкиот дом на САД, Кевин Мекарти, во Калифорнија. Оваа посета кинеските власти ја нарекоа провокација и уште еднаш истакнаа дека Тајван е нераскинлив дел од Кина
„Овие операции служат како строго предупредување против дослух меѓу сепаратистичките сили кои бараат ‘независност на Тајван’ и надворешните сили и против нивните провокативни активности. Тие се неопходни за да се зачува националниот суверенитет и територијалниот интегритет на Кина“,
стои во соопштението од Пекинг.
Тридневната операција под името „Обединет остар меч“ ќе трае до понеделник, а додека траат вежбите ќе бидат организирани и патроли кои ќе напредуваат околу Тајван.
Извор: 360stepeni.mk
