Бразил како првопласиран во групата Ц ја заврши првата фаза од СП. По воведниот нерешен резултат против Мароко, Бразилците ги победија селекциите на Хаити и Шкотска, а асот на Реал Мадрид, Винисиус, беше стрелец за „Селесао“ на сите три натпревари.
Вини постигна вкупно четири гола и го дели второто место со Мбапе и Халанд на листата на стрелци зад Меси, кој беше единствениот што успеа да постигне пет гола.
Синоќа тој постигна гол со глава во убедливата победа на Бразил од 3:0 над Шкотите, што е некарактеристично за него, и откри дека му дал такво ветување на тренерот Карло Анчелоти пред натпреварот, и дека очекува подарок за тоа.
„Му ветив на тренерот дека ќе постигнам гол со глава. Ми рече дека е речиси невозможно и дека ќе ми даде подарок ако успеам. Го чекам“, рече веселиот Винисиус.
Во првата елиминациска рунда, Бразил ќе игра против второпласираниот од групата Ф, кој би можел да биде Холандија, Јапонија или Шведска.
Извор: vecer.mk
