Вчера, во близина на турското одморалиште Мармарис, потона екскурзискиот брод „Биг Бос Дајмонд“ украсен во пиратски стил, а 148 патници, меѓу кои и Британци, беа принудени да скокнат во морето за да се спасат. Бродот почна да испушта вода недалеку од брегот на островот Парадајс, пишува Дејли Меил.
Драматичните снимки покажуваат туристи како скокаат од бродот, кој почна да се навалува на едната страна. Подоцнежните снимки покажуваат само јарболи како штрчат од морето, опкружени со остатоците и другите пловила што дојдоа на помош. Во рок од еден час, бродот целосно потона.
Брза акција за спасување
„Биг Бос Дајмонд“ исплови вчера од Мармарис на редовно еднодневно патување до островот Парадајс. Бродот почна да испушта вода во близина на живописниот залив Акварјум, по што брзо беа ангажирани турски спасувачки екипи. Сите 148 патници, меѓу кои и дваесет деца, мораа да скокнат во Средоземното Море. За среќа, сите беа безбедно изнесени на брегот.
„По пријавата, екипи беа испратени на терен и, со помош на блиските бродови, ја координираа евакуацијата на патниците. Проверката утврди дека нема жртви, повредени или лица со здравствени проблеми. Сите евакуирани граѓани беа безбедно транспортирани до брегот“, изјави гувернерот на покраината Мугла, каде што се случи несреќата.
„Најголемиот пиратски брод во Турција“
Компанијата Јагна Туризам, која управува со бродот, го опишува „Биг Бос Дајмонд“ како најголем пиратски брод во Турција.
Се рекламира како „семеен забавен брод“ каде што, за само 35 фунти, патниците можат да уживаат во неограничено пиво, коктели и вино. Се нудат и активности како што е лов на богатство, а диџеј е задолжен за атмосферата. Видеата од претходните патувања прикажуваат туристи како танцуваат на палубата со аниматор облечен како пират.
Компанијата се огласи и на социјалните мрежи.
„Драги гости и пријатели, ви благодариме на сите за вашата загриженост и прашања. Сите сме безбедни и здрави. Додека „Биг Бос Дајмонд“ не се поправи, ќе ги продолжиме нашите екскурзии на „Биг Бос Јагна““, рекоа тие.
Извор: vecer.mk
