Тренерот на Милан, Масимилијано Алегри, се обиде филозофски да го погледне поразот од 2-1 од Каљари во последното коло од Серија А. Поразот беше исклучително болен за „росонерите“, бидејќи ги исфрли од првите четири екипи во Лигата на шампионите. Тој призна дека никој не го очекувал овој пораз, но сепак одби да ги критикува своите играчи и ги пофали за нивната посветеност.
„За жал, сега не можеме да го промениме резултатот. Кога губиме пет домашни натпревари на начинот на кој губиме, се наоѓаме во оваа позиција. Започна добро, мислевме дека со водството во резултатот, беше врзано во крпа, но не беше така и се браневме многу лошо, особено за првиот гол. Немам за што да им замерувам на моите момци, тие направија апсолутно сè што е можно за да се квалификуваат во Лигата на шампионите“, рече Алегри.
„Во овој момент сум разочаран, лут затоа што ја пропуштивме Лигата на шампионите. Откако ја победивме Џенова минатата недела, никој не очекуваше таков пораз. За жал, ова е спорт, мора да го прифатиме тоа. Мораме да ја оцениме целата сезона, не можам да ги обвинам моите момци за ништо, тие дадоа сè од себе на теренот цела година. Не знам што се случи, сигурно направивме грешки за време на тие порази, но ја вративме ситуацијата на вистинскиот пат против Џенова. Кога го оценувате крајот на сезоната, природно е резултатите да ве натераат да ги гледате работите поинаку, но мора да бидеме трезвени кога ја гледаме целосната слика“, додаде специјалистот.
Недостатокот на решителност долго време беше проблем за Милан, дури и пред да пристигне Алегри минатото лето.
„Бевме премногу пасивни за двата гола на Каљари, што никогаш порано не се случило. Се справивме подобро против Џенова, но вечерва имаше поголем притисок и не можевме да го свртиме натпреварот“, додаде тренерот.
Конечно, беше замолен да коментира за неговата иднина на чело на Милан.
„Не знам за иднината, во моментов моите мисли се насочени само кон недостатокот на резултати. Секако, целата година треба да се оцени, беа направени грешки, но нема смисла да се зборува за тоа сега“, заклучи Алегри.
Извор: vecer.mk
