Идејата за двотретинско гласање при изборот на државен јавен обвинител одамна се провлекува и таа е доста квалитетна сугестија, меѓутоа ниту една власт која го носи законско решение не посегнува по таква интервенција, изјави адвокатот Драган Малиновски во вечерашната дебата во „Вин-Вин“ на ТВ Телма.
„Тоа е добро од една едноставна причина. Прво, за да биде избран ќе треба да биде прифатлив за поширокиот дел од политичкиот спектар. И второ што е поважно, ќе даде една стабилност на државниот обвинител додека го извршува својот мандат да не може, ако некому не му се допадне некое решение или постапка, веднаш да биде разрешен од функцијата“, смета Малиновски.
Поголемиот стаж што го има во судница како судија за мене е предност, изјави адвокатот Драган Малиновски во „Вин-Вин“ на ТВ Телма за изборот на Ненад Савевски за кандидат за државен јавен обвинител.
„Ќе беше прекрасно да некој стаж да имал и како адвокат, па да ги има сите аспекти пред себе кога настапува од позицијата на државен јавен обвинител. Биографијата е сосема коректна, гледам каде бил се активен, надвор од она што бил како судија“, смета Малиновски.
Извор: zurnal.mk
