На денешното рочиште за предметот „Кочани“, кое се одржа во судницата во Идризово, сведочеше Горан Игновски, сопственик на продавницата од која групата ДНК претходно купувала опрема за сценски ефекти. Тој изјави дека прскалките од кои настанал пожарот во дискотеката „Пулс“ не биле купени од неговата продавница, туку дека станува збор за тип на прскалки со поголем домет, какви што, според него, се продаваат на Бит Пазар.
Игновски објасни дека во неговата продавница се продавале прскалки со домет од еден до два метра, додека оние што биле користени во дискотеката имале домет од повеќе од три метри. Неговата фирма „Чкаља“ ДООЕЛ, која работи под брендот „Де аудио“, има продавница во скопската населба Кисела Вода и нуди различна опрема за сценски ефекти – осветлување, машини за конфети, машини за балони, ладни фонтани, прскалки на прашок, машини за чад на база на вода и друга сценска техника.
Сведокот појасни дека ваквата опрема најчесто не ја купуваат сопствениците на ресторани или локали, туку изведувачите и организаторите на настани, кои сами си ја обезбедуваат за своите настапи.
– Постојат топли и ладни фонтани. Топлите работат со барут, ист како прскалките што се ставаат на тортите и прскаат еден до два метра. Има фонтани за надворешна и за внатрешна употреба. Ние имавме и куферчиња за нивна активација, кои ги увезувавме легално. Примероци од нив им дадовме на надлежните за вештачење. Во куферчето се става патрон и во даден момент се активира со далечинско. Може да се постават наутро, а да се активираат навечер – рече Игновски.
Тој објасни дека ладните фонтани се големи и видливи на сцена, со димензии околу 30 на 20 сантиметри, и се поисплатливи за користење, но уредите за нив се скапи, па затоа многумина користат топли фонтани.
Извор: zurnal.mk
