Општина Битола и Ракометниот клуб „Еурофарм Пелистер“ ја продолжуваат заедничката платформа за развој на ракометот во градот. Градоначалникот на Битола, Тони Коњановски и претседателот на клубот, Зоран Стерјев, денеска ставија потписи на нов договор со кој се продолжува соработката и поддршката за ракометната гордост на градот.
При потпишувањето на договорот, градоначалникот Коњановски истакна дека продолжувањето на платформата претставува голема чест и задоволство, нагласувајќи дека во изминатите шест години таа била продолжувана во три наврати и донела значајни резултати.
„Отвараме нов период на обострано задоволство. Јас секогаш потенцирам дека ова треба да биде мотив како спортот, бизнисот и градот можат да функционираат заедно во една платформа. Голема благодарност до спортската јавност, новинарите, медиумите, граѓаните на Битола и секако до Чкембарите.
Сите заедно влегуваме во еден светол период со уште поголеми амбиции за ракометот. Овој спортски храм треба да живее и натаму“, изјави Коњановски.
Тој додаде дека општината има сериозни иницијативи и значителни вложувања во спортот, при што резултатите веќе се видливи, а очекувањата се тие да бидат уште подобри во иднина.
Претседателот на РК „Еурофарм Пелистер“, Зоран Стерјев, изрази благодарност до Општина Битола и градоначалникот за досегашната соработка, нагласувајќи дека новата платформа претставува продолжение на успешниот модел на обединување.
„Оваа платформа можеби ќе биде малку поразлична, но и досега беше платформа на обединување. Сега тоа обединување станува уште поголемо. Очекуваме кон неа да се приклучат и други стопански субјекти кои веќе го најавуваат своето присуство. Тоа е доказ дека ова е вистинскиот пат по кој треба да се движиме за успех и во спортот и во градот“, изјави Стерјев.
Тој додаде дека амбициите на клубот се високи и дека секоја година се поставуваат нови, поголеми цели. Главните таргети се освојување на сите домашни титули, достојно претставување во европските натпреварувања и повторно учество во Лигата на шампионите.
„Овој град, оваа публика, играчите и сите кои се дел од клубот заслужуваат Битола да остане меѓу 16-те градови во Европа каде се игра најквалитетниот ракомет“, истакна Стерјев.
Со продолжувањето на оваа платформа, Битола ја потврдува својата посветеност кон развојот на ракометот и зајакнување на спортската традиција која со децении го прави градот препознатлив на домашната и европската спортска сцена
Извор: zurnal.mk
