Во општините Загори, Филијатес и Зирос е прогласена вонредна состојба, додека северен Крф претрпе значителни штети во инфраструктурата, објави ERT News.
Селата во северна Џумерка останаа без електрична енергија, а проблеми се пријавени и во планинските области Каламбака, Кожани и Аспропотамос.
Во Филипијада, поплавите, паднатите столбови и лизгањето на земјиштето предизвикаа сериозни нарушувања, додека слични проблеми беа пријавени и во општина Арта, каде што се случија прекини во електричната енергија и штети на патната мрежа.
Областа Педини во близина на Јанина беше исто така погодена од поплавите.
Во градот Коница, инфраструктурата и електричните мрежи беа оштетени, додека голем дел од општина Масторохори е без електрична енергија, а регистрирани се и проблеми со водоснабдувањето.
Локалната самоуправа побара прогласување вонредна состојба за да се забрза закрепнувањето.
Системот за тревога беше активиран вчера во Јанина, Арта, Превеза и Теспротија поради ризик од свлечишта.
Тим за цивилна заштита предводен од заменик-министерот за климатски кризи и цивилна заштита Костас Кацафадос е на Крф, каде што бурното време предизвика голема штета, со улици покриени со камења, кал и остатоци.
Врнежите од дожд на Крф беа исклучително интензивни – 220 милиметри дожд паднаа за помалку од два часа, што го објаснува обемот на штетата.
Противпожарната служба останува во состојба на висока готовност.
Метеоролозите предупредуваат дека опасноста не е завршена, бидејќи водата од планините продолжува да се слева во пониските области.
До попладнево во западна Грција се очекуваат дождови, со јужен ветер и температури над сезонските, до 25 степени во некои региони.
Во Атина се предвидува дека температурите ќе се движат од 22 до 23 степени Целзиусови со можност за локални врнежи од дожд, додека во Солун ќе биде облачно со повремени врнежи од дожд и температури околу 18 и 19 степени Целзиусови.
Од утре се очекува разведрување, со повлекување на јужните ветрови и пад на температурите, со можност за краткотрајни снежни врнежи во планинските делови на Епир.
Во понеделник се очекува стабилно време, без дожд, со утрински температури на север до минус два степени Целзиусови и највисоки дневни температури околу 18 и 19 степени Целзиусови во Атина.
Од вторник се предвидува нов бран дожд и јужни ветрови, со врнежи што ќе траат во западна Грција до следната сабота.
Извор: vecer.mk
