Поради зголемениот број напади од мечки, Јапонија ѝ дозволи на полицијата да користи оружје за убивање мечки почнувајќи од четврток, објавија локалните медиуми.
Според извештајот на Кјодо њуз, стапија на сила новите правила донесени од владата во септември, кои им дозволуваат на полицајците да „користат оружје за убивање мечки“ во ситуации каде што тие претставуваат закана за човечкиот живот.
Досега, употребата на огнено оружје од страна на полицијата не беше експлицитно забранета, но беше ограничена на сериозни кривични дела како што се киднапирања и вооружени напади.
Одлуката доаѓа откако бројот на смртни случаи од напади од мечки од април до 5 ноември достигна рекордни 13, највисок досега регистриран во земјата, според Министерството за животна средина на Јапонија.
Повеќето од смртните случаи се пријавени во североисточните префектури Ивате и Акита, каде што се распоредени специјални полициски единици вооружени со огнено оружје.
Локалните власти во овие области ќе формираат два тима составени од командант, офицер за врска со локалните власти и двајца снајперисти.
Порано овој месец, Јапонија распореди војници во североисточниот дел од земјата за да помогне во спречувањето на растечкиот број напади од мечки.
Новите мерки вклучуваат дозволување на ловџиите да „употребуваат оружје во итни ситуации“ против опасни животни што влегуваат во населени области и охрабрување на поранешните полицајци и војници да добијат лиценци и да учествуваат во операции.
Извор: tv21
