Во Австралија, научниците открија два нови вида морски животни – полупровиден рак со големина на бадем и мала светлечка ајкула-ламба.
Меѓу стотиците примероци собрани од научниците за време на истражувачкото патување беше новоопишаната западноавстралиска ајкула-ламба, која може да порасне до 40 сантиметри во должина, има големи очи и светлечки стомак, а е пронајдена повеќе од 600 метри под површината на океанот, објави Би-Би-Си. (фото на линкот)
„Ајкулите-ламба се биолуминисцентни, а светлината ја создаваат фотофори лоцирани на нивниот стомак и страници, од каде доаѓа и нивното име“, рече Вил Вајт, експерт за риби.
Откриен е и нов вид „порцелански“ рак, долг околу 15 милиметри, кој е пронајден на околу 122 метри под нивото на морето.
Наместо канџи, тие користат влакна за да зграбат храна, покажаа резултатите од откритието.
„Порцеланските ракови се познати како филтер-хранилки, тие се хранат со планктон користејќи модифицирани усни делови со долги влакна за да пребаруваат во водата за мали парчиња храна како што е планктон, наместо типичниот метод на ракови за грабање и штипкање храна со канџите“, рече д-р Ендру Хози, кустос по водена зоологија во Музејот на Западна Австралија.
Околу 20 нови видови се откриени како резултат на патувањето досега, вклучувајќи мал црвен октопод, со големина од околу четири сантиметри.
Истражувачите проценуваат дека уште околу 600 видови сè уште не се опишани и именувани, бидејќи на научниците може да им требаат години да соберат информации за да докажат дека примероците се уникатни.
На крајот на 2022 година, научниците од австралиската научна агенција CSIRO започнаа истражувачко патување во морскиот парк Гаскојн, на околу 20 километри од брегот на Западна Австралија.
Австралија, потсетува Би-Би-Си, е еден од најголемите центри за биодиверзитет во светот, дом на повеќе од милион различни видови, од кои многу не се наоѓаат никаде на друго место на Земјата.
Извор: kurir.mk
