Познаатиот актер Џеки Чен ќе биде амбасадор на специјализираната изложба EXPO 2027 во Белград, дознаваат медиумите.
Точната сума за неговиот ангажман не е официјално откриена, но според достапни информации, хонорарите за вакви активности се движат од 250.000 до 750.000 американски долари. Во држава каде што просечната плата тешко го надминува прагот од 900 евра, а трошоците за живот нагло растат, ваквите износи делуваат како омаловажување за граѓаните кои веќе трпат последици од нефункционалните јавни сервиси и нестабилниот правен систем.
На прашање на неделникот „Време“ колку средства се предвидени за амбасадорите на EXPO, директорот Данило Јериниќ не даде прецизен одговор, ниту го потврди, ниту го негира ангажманот на Џеки Чен. Тој истакна дека ангажманот на амбасадорите го финансираат спонзори, а не државата.
Трошоците за ангажирање амбасадор не се покриваат од џебот на граѓаните, туку тие средства ги обезбедуваат спонзорите на изложбата. На пример, на EXPO во Дубаи амбасадор беше Лионел Меси, што значително го подигна имиџот на настанот и земјата домаќин.
Зошто токму Џеки Чен?
Џеки Чен долги години е дел од светски кампањи – од 2004 година е амбасадор на УНИЦЕФ и активно се залага за заштита на децата, здравјето и животната средина. Роден во Хонг Конг, Чен во последниот период отворено ја поддржува политиката на Комунистичката партија на Кина и претседателот Си Џинпинг.
Изборот на Џеки Чен недвосмислено ја покажува намерата на организаторите да привлечат што повеќе гости и посетители од Кина на белградскиот EXPO.
Како потсетување, во јуни оваа година светскиот рекордер на 100 метри, Јусеин Болт, исто така беше промовиран како еден од амбасадорите на изложбата EXPO 2027.
Извор: Време
Извор: vecer.mk
