25
Американскиот претседател Доналд Трамп изјави дека не планира распоредување на американски војници на украинска територија, но остави отворена можност САД да обезбедат воздушна поддршка како дел од мировен договор за прекин на војната меѓу Русија и Украина.
Изјавата доаѓа ден по вонредниот Самит во Белата куќа, на кој Трамп вети безбедносни гаранции во обид да се стави крај на конфликтот. Сепак, и понатаму останува нејасно каква конкретна воена помош би можела да добие Украина, додека Вашингтон и сојузниците сè уште ги прецизираат можните чекори.
„Кога станува збор за безбедноста, (Европејците) се подготвени да испратат војници на терен. Ние сме подготвени да помогнеме на различни начини, особено, најверојатно… од воздух“, изјави Трамп за „Фокс њуз“.
Во подоцнежно интервју за радио-водителот Марк Левин, тој го опиша својот пристап кон преговорите за завршување на војната како „повеќе инстинкт, отколку процес“.
Само неколку часа по посетата на украинскиот претседател Володимир Зеленски во Вашингтон, Русија изведе најголем воздушен напад врз Украина во последниот месец. Според украинските воздушни сили, биле испукани 270 дронови и 10 ракети, при што се предизвикани големи пожари во енергетски постројки во регионот Полтава, каде што се наоѓа единствената нафтена рафинерија во земјата.
Извор: zurnal.mk
