Директорот на Центарот за управување со кризи, Мухамед Али, и заменик-министерот за земјоделство, шумарство и водостопанство, Албрим Хоџа, денеска беа присутни на терен кај селото Октиси, каде што беше активен голем пожар.
Иако огнената стихија зафати значителна површина, навремената интервенција овозможи пожарот да биде ставен под контрола. На одредени локации и понатаму има појава на чадења, кои се внимателно следени од екипите на терен.
Во акцијата за гаснење учествуваа:
- авион „Ер трактор“ на ДЗС, кој интервенираше од воздух,
- 6 пожарникари и едно противпожарно возило од ТППЕ – Струга,
- 10 лица од ЈП „Македонски шуми“,
- 2 возила „Пинцгауер“ од ДЗС,
- локални жители.
Благодарение на одличната координација меѓу сите служби и несебичната помош на населението, спречено е ширење на пожарот кон куќите и селото.
Надлежните апелираат граѓаните да бидат особено внимателни и да пријавуваат секое забележано чадење или оган, со цел да се избегне повторно активирање на жариштата.
ИЗВОР: ТВ 21
