Зголемен сообраќаен интензитет и задржувања од околу еден час се евидентирани денеска на граничните премини Табановце и Богородица, информира Авто-Мото Сојузот на Македонија (АМСМ).
Според информациите, засилената фреквенција на возила е резултат на сезонските патувања и интензивното движење на патници низ коридорите што водат кон и од туристичките дестинации.
Од АМСМ наведуваат дека на останатите гранични премини сообраќајот се одвива без значајни застои, и во моментов не се бележат подолги задржувања при влез или излез од државата.
Што се однесува до внатрешниот сообраќај, движењето на возилата на државните патишта се одвива по суви коловози, без прекини, но со зголемен интензитет, особено надвор од урбаните средини.
АМСМ апелира до возачите на зголемено внимание, прилагодување на брзината и доследно почитување на сообраќајната сигнализација. Посебно внимание се препорачува при возење низ котлини, речни долини и клисури, каде постои опасност од одрони.
ИЗВОР: racin.mk
