Семејни недоразбирања и нерасчистени имотни прашања според обвинителството се причина што 63 годишниот прилепчанец вчера ги убил 43 годишниот внук од сопствена сестра и неговиот 12 годишен син.
Убиецот телефонски му се јавил на неговиот внук и го поканил да дојде во неговиот дом инсистирајќи да го земе и неговиот 12годишен син со него. Според полцијата убиството се случило околу три или четири часот попладне. Потоа убиецот на фејсбук напишал статус со сомнителна содржина каде истиот ја прозива неговата сестра и внукот.
Полицијата пристигнала во куќата на убиецот откако вознемирената сопруга и мајка на убиените синоќа околу 21 часот пријавила дека со часови ги нема нејзините најблиски и дека се сомнева дека се кај вујкото на сопругот.
Таа пред да пријави се упатила кон куќата на вујкото, видела дека влезната врата е затворена и никој не се одзива на нејзините довикувања, а надвор пред куќата го забележала паркиран автобмобилот на нејзиниот сопруг.
Кога полицајците се обиделе да влезат во куќата, убиецот употребил експлозивна направа, а потоа почнал и да пука кон нив.
Сања Стаматова портпаролка на СВР Битола
„Полициските службеници извршиле проверка во домот на сторителот, но никој не ја отворал вратата. По наредба од јавен обвинител, полициските службеници со употреба на сила, ја отвориле вратата и кога влегле во куќата, едно лице фрлило бомба кон нив која почнала да чади, но не експлодирала. Откако полициските службеници излегле од куќата, било пукано кон нив, а тие возвратиле од службено оружје, пукајќи кон куќата “
По престрелката со полицијата убиецот сам си го одзел животот. Трагедијата завршила околу еден часот изутрината, а кога влегла полицијата ги пронашла трите безживотни тела. Обвинителството издаде наредба за обдукција на починатите, како и за прибирање на сите траги, оружје и муниција пронајдени на лице место кои ќе бидат предмет на вештачење.
Извор: 24vesti.mk
