Градежни работи на автопатот Кичево–Охрид предизвикуваат револт кај жителите на околните села. Жителите кои живеат во близина на делот каде што се изведуваат работите се жалат дека им се блокирани пристапите до нивните домови, а никој не им објаснил дали ќе добијат пристап до своите куќи. Во Подмолје, жителите велат дека сега се приморани да прават цел круг низ селото за да излезат на главниот пат.
„Помина една жена тука и не знаеше каде да оди. Ѝ реков оди до ‘Амбасадорот’ и излезе кај автобуската станица. Тоа е тоа, ако вака биде, добро е.“
„Честитки за динамиката на градбата, но дали сте свесни дека со изградбата на автопатот има куќи што се веднаш до него и ќе останат блокирани? За нив не е предвиден излез кон локален пат во проектот за локалните патишта, така што тие ќе останат блокирани и нефункционални.“
Од Јавното претпријатие за државни патишта информираат дека покрај забрзаното темпо на изградба на сегментот од автопатот, моментално се работи и на изградба на пристапните патишта кон селата околу автопатот.
„Со забрзано темпо напредува изградбата на пристапните патишта од Врбјани до Сливово, Сливово-Арбиново, Арбиново-Издеглавје, Издеглавје-Песочан, Песочан-Ново Село, Ново Село-Ботун, како и изградбата на пристапните патишта.“, велат од ЈП Државни патишта.
Инаку, дел од автопатот Кичево–Охрид од селото Врбјани до Охрид, кој требаше да биде пуштен во употреба минатиот месец, се очекува да биде отворен на 15 јули.
ИЗВОР: ТВ 21
