ГАЗА/ИСТАНБУЛ (АА) – Најмалку 21 Палестинец е убиен, а десетици се повредени во израелските напади од раните утрински часови во Појасот Газа, соопштија медицински извори, јавува Анадолу.
Седум лица се убиени, а многумина се повредени во израелски напад врз училиште претворено во засолниште во населбата Зејтун во градот Газа, изјавија медицински извори за Анадолу.
Во израелските напади убиени се уште три лица, меѓу кои и две деца, а многумина се повредени во друго училиште каде што се сместени раселени Палестинци, во населбата Шеик Ридван во градот Газа.
Медицински извори изјавија дека братче и сестриче се убиени, а повеќемина се повредени во израелски напад со дрон врз станбена зграда во бегалскиот камп Ал-Бурејџ.
Израелските напади таргетираа дом во бегалскиот камп Магази, во централниот дел на Појасот Газа, при што убиени се двајца Палестинци, изјавија медицински извори.
Палестински лекар и четири негови синови се убиени во израелски напад со дрон врз шатор во кој се сместени раселени лица во Ал-Маваси, западен Кан Јунис, според медицински извори.
Во истата област, еден Палестинец и неговиот единствен син се исто така убиени во израелски напад врз шатор.
И покрај меѓународните повици за прекин на огнот, израелската армија спроведува геноцидна војна во Газа, убивајќи над 57.200 Палестинци, повеќето од нив жени и деца, од октомври 2023 година.
Минатиот ноември, Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за своите воени дејства во енклавата.
Извор: Anadolu Agency (AA)
