Претседателот на СДСМ официјално ги објави новите имиња за кандидати за градоначалници на неколку општини за претстојните локални избори. Меѓу нив, најголемо внимание привлече одлуката за Струмица – каде актуелниот градоначалник Костадин Костадинов нема да оди по нов мандат.
Наместо него, СДСМ ќе настапи со нов кандидат – Марјан Даскаловски, актуелен претседател на општинската организација на партијата во Струмица.
Актуелниот градоначалник Костадинов на Фејсбук, со долг и емотивен статус ја објасни причината за своето повлекување од трката.
„Во сегашната политичка слика, мојата кандидатура – од било која партија – е бесмислена“, истакна Костадинов, додавајќи дека не станува збор за страв од пораз, туку за недостиг од вистински предизвик и визија.
Со овој потег, тој најави и замрзнување на членството во СДСМ, сè додека, како што вели, „СДСМ не се врати таму каде што и е местото“.
Во статусот, Костадинов направи и ретроспектива на своето работење, посочувајќи низа проекти кои го обележале неговото градоначалничко портфолио – електричен јавен превоз, нови паркови, велосипедски патеки, урбанистички планови, зелени површини, транспарентност и финансиска стабилност на општината.
„Ова не е крај. Ова е гест – гест на зрелост, на чесност, на демократија. Да се повлечеш кога си најсилен – е најголема храброст“, порача Костадинов, додавајќи дека ќе остане активен во јавниот живот, најавувајќи ново интерпартиско делување по завршувањето на изборите.
Од СДСМ засега нема дополнителен коментар, освен кратката најава за новиот кандидат Даскаловски.
ИЗВОР: racin.mk
