Приемниот тест за учениците во средното медицинско училиште во Гостивар беше закажан за 10 часот наутро, но беше бојкотиран! Родителите излегоа со барања до училиштето, општината и министерството. Тие бараат да бидат примени сите ученици со максимални поени и да се отвори дополнителна паралелка.
-Нека се зголеми бројот на паралелки во ова училиште или да се примат сите ученици со максимални поени ако капацитетот на училиштето го дозволува тоа. Со ова писмо бараме откажување на планираниот тест и разгледување на друг начин за да се избегне дополнителен стрес и незадоволство или евентуални поплаки од родителите и кандидатите, изјави Бејлул Мустафа, претставник на родителите.
Од средното медицинско училиште велат дека се запознаени со случајот, но мораат да го почитуваат законот. Не исклучуваат компромис за да може да се отвори нова паралелка.
-И втората опција е овие четириесет лица што ќе останат да конкурираат за позицијата лабораториски асистент или забен техничар, а потоа да останат само уште 14 кои ќе треба да бидат вклучени. Веднаш побаравме список на ученици што треба да го полагаат испитот, но засега нема одговор, изјави Шпенд Бајрами, педагог во средното медицинско училиште во Гостивар.
Во обид да се најде решение, на состанокот дојдоа и претставници на Министерството за образование, но без резултати. Родителите ќе чекаат одговорот во текот на неделата, а доколку нивните барања не бидат исполнети, ќе продолжат да протестираат заедно со учениците.
Инаку, пред неколку дена, Министерството за образование информираше дека оваа година, доколку во некои училишта се пријават повеќе ученици од предвидениот број за упис, а имаат исти оценки и поени, ќе се организира квалификациски тест.
ИЗВОР: ТВ 21
