ЕРУСАЛИМ (АА) – Израелскиот министер за домување, Јицхак Голдкнопф, денес поднесе оставка поради неуспехот на Владата да го донесе законот со кој ќе се ослободат ултраортодоксните Евреи од задолжителната воена служба, јавува весникот „Једиот ахронот“, пренесува Анадолу.
Оставката следуваше откако ултраортодоксната заедница продолжува со протестите против служењето војска, откако Врховниот суд на Израел на 25 јуни 2024 година донесе одлука со која се наложува нивно регрутирање, како и забрана за финансиска поддршка на верските институции чии ученици одбиваат да служат.
Ултраортодоксните Евреи, познати како Хареди, сочинуваат околу 13 отсто од 10-милионското население на Израел.
Тие се против задолжителната воена служба од верски причини, тврдејќи дека изучувањето на Тората е нивна примарна обврска и дека интеграцијата во секуларното општество претставува закана за нивниот религиски идентитет и заедничкиот живот во заедницата.
Извор: Anadolu Agency (AA)
