АНКАРА (АА) – Во израелските напади низ Газа од утринава се убиени 23 Палестинци, а над 100 се повредени, вклучително и 17 жртви во близина на пункт за хуманитарна помош поддржан од Израел, според локалните медиуми, јавува Анадолу.
Официјалната палестинска новинска агенција Вафа објави дека најсмртоносниот напад бил извршен во близина на областа на коридорот Нецарим, јужно од градот Газа, каде што израелските сили отвориле оган врз цивилите што се собирале за помош од пункт за дистрибуција на помош поддржан од Израел, при што се убиени 17 лица, вклучително и едно дете.
Загинаа три члена на едно семејство кога шатор на раселени лица во Кан Јунис, Јужна Газа, беше бомбардиран од израелската армија, а други напади беа насочени кон домови и објекти на Црвената полумесечина во Деир ал-Балах, Централна Газа, при што имаше уште три жртви.
Нападите се извршени откако израелски беспилотни летала фрлаа димни бомби над источните области на градот Газа, објави и Вафа.
Израелската армија, отфрлајќи ги меѓународните повици за прекин на огнот, спроведува брутална офанзива во Газа од октомври 2023 година, при што се убиени речиси 55.000 Палестинци, повеќето жени и деца.
Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата поради својата војна против енклавата.
Извор: Anadolu Agency (AA)
