Умесни ли се прослави на политички партии по неполни три месеци од една од најголемите трагедии во Македонија која однесе 62 млади животи?
Двете најголеми македонски партии ВМРО-ДПМНЕ и СДСМ преку своите млади сопартијци си разменија жестоки пораки – за опозициската СДСМ вчерашната прослава на Унијата на млади сили на ВМРО ДПМНЕ била „срамна„ а употребата на пиротехника која после катастрофалниот пожар во импровизираното диско е забранета, како „скандалозна“.
Од владеачката ВМРО-ДПМНЕ пак, возратија дека опозицијата се занимавала со некрофилство. СДСМ бара итна реакција од МВР како и казни за корисниците на пиротехниката, додека пак ВМРО ДПМНЕ посочува дека забраната за употреба на пиротехника се однесувала на затворени простории, а собирот бил на отворено.
И додека секоја сабота по Кочанските улици протестираат родителите на загинатите деца носејќи нивни фотографии и барајќи правда за смртта на 62 млади луѓе, двете најголеми партии и понатаму продолжуваат со меѓусебни обвинувања за злоупотреба на болката на семејствата и катастрофалната трагедија за некој дополнителен политички поен.
Извор: 24vesti.mk
