Економскиот раст од 3 отсто што го објави премиерот Христијан Мицкоски, според кој Македонија е четврта во Европа според пораст на БДП, предизвика силни реакции. Владата го претставува како доказ за успешна економска политика, додека опозицијата предупредува дека зад бројките се крие сурова реалност во која граѓаните осиромашуваат. Економистите пак, со поделени мислења: едни го поздравуваат растот, други предупредуваат дека граѓаните не чувствуваат никаква придобивка.
Според Мицкоски, Македонија бележи еден од највисоките економски пораст во Европа – веднаш зад Ирска, Данска и Полска. Тој додаде дека ова е резултат на сериозен пристап кон економската политика, стабилни финансии и иницирање крупни инфраструктурни проекти.
Опозицијата, пак, обвинува за манипулација и статистички игри. Велат дека вистинската слика се гледа во празните фрижидери, ниските плати и растечките цени.
– Со инфлација од 3 отсто и идентичен пораст, нема реална добивка. Народот не чувствува подобрување. Се соочуваме со поскапувања, празни паричници и сè поголем број граѓани кои земаат брзи кредити за да преживеат – велат од СДСМ.
Економистите: растот мора да биде повисок за да се почувствува
Економистите се согласни во едно – порастот сам по себе не е доволен ако не се одразува врз стандардот. Според нив порастот од 3 отсто е реален, но не е доволен за граѓаните да почувствуваат вистинска придобивка, порастот треба да биде над 5 отсто.
Исто така, економистите сметаат дека билатералните договори, како оној со Велика Британија, се важни, но уште поважно е како се користат средствата добиени преку нив.
Некои економисти предупредуваат дека последиците од економскиот раст или пад граѓаните најдиректно ги чувствуваат преку сопствениот џеб. Според нив, статистичките податоци може да бидат точни, но не секогаш ја одразуваат реалната економска слика. Особено во мала економија, каква што е македонската, дури и прекин на работа на еден капацитет може значајно да влијае врз општата економска состојба. Затоа, неопходни се повеќе инвестиции, отворање нови фабрики и зголемување на продуктивните капацитети.
Одреден дел од економистите се далеку поскептични. Според нив, сегашниот раст е вештачки и се должи главно на засилената активност во градежниот сектор, а не на зголемено производство и извоз. Тие предупредуваат дека кредитите кои се земаат денес ќе треба да се вратат утре, а дека животниот стандард на граѓаните опаѓа. Зголемениот број на брзи кредити, велат тие, е јасен показател дека сè повеќе луѓе преживуваат од месец за месец.
ИЗВОР: racin.mk
