Одбранбениот фудбалер на Интер, Федерико Димарко, им се обрати на навивачите по тешкиот пораз во финалето на Лигата на шампионите од ПСЖ (0:5).
– Навивачи на „Нероаѕурите“, чувствувам потреба да разговарам со вас. Веќе неколку дена не можам да мислам на ништо друго, барам објаснување за тоа што се случи. Сè тргна наопаку. Лесно е да се зборува кога сè оди добро. Сакам да ја преземам одговорноста. По таков пораз, сакам да им кажам на сите навивачи на Интер дека ми е жал.
Жалам за поразот и за начинот на кој се случи, бидејќи бевме на чекор од сон. Сакав да ве направам среќни, но не можев. Но, немојте да мислите дека ова не ми тежи. Го чувствувам ова страдање во мене. Ги чувствувам истите чувства како и вие. Разочарување, лутина, фрустрација. Жал ми е за сите вас кои жртвувавте време и пари за да бидете таму, но и за сите оние кои не можеа да дојдат, иако сакаа. Жал ми е бидејќи јас сум еден од вас.
Не бев најдобрата верзија од себе. Не сакам да го кријам или да се преправам дека ништо не се случило. Жртвував многу за да стигнам до оваа точка, а во најважниот момент не можев да бидам вашиот вообичаен Федерико. Секогаш ќе носам оваа лузна. Никогаш нема да исчезне, но секогаш ќе ме потсетува дека е исто така важно да се сака безусловно тимот. Радување на победи, страшно страдање по порази. Но, правејќи го сето ова заедно ќе ни помогне да ги надминеме овие ужасни чувства. И еден ден пак ќе се радуваме. Тоа е убавината да се биде Интерист. Во добро или во лошо, но заедно! – напиша Димарко.
Интер покрај загубеното финале во елитното фудбалско натпреварување, го загуби и трофејот во Серија во последните две кола, а исто така не стигна ниту до трофејот во Купот на Италија.
Извор: kurir.mk
