Градоначалникот на Кисела Вода и претседател на ЗЕЛС Орце Ѓорѓиевски со апел до надлежните по новите дојави за бомби во училиштата низ скопските општини.
-Ова е класична тортура врз учениците, наставниците и сите граѓани во Македонија. Во име на родителите барам да ставите крај на хаосот, порача тој.
Неговата објава ви ја пренесуваме во целост:
ЗЕЛС апелира и го повикува МВР да преземе сериозни чекори за пронаоѓање на испраќачите на маил пораки за поставени бомби низ училиштата во Скопје и другите градови.
Родителите повеќе не се должни и не можат да го издржат овој притисок кој секако е плод на неодговорно однесување на некои субјекти, но и е плод на неможноста на МВР да стави крај на оваа ерозија на системот!
Ова не е ситуација која се случува од пред неколку дена туку со месеци и претставува тортура за граѓаните.
Како претседател на ЗЕЛС го повикувам министерот Спасовски да ги заврши објаснувањата како не можат да ги најдат сторителите, бидејќи во системот и МВР и тој е поставен за министер токму да ги најде сторителите.
Не поминува повеќе никакво објаснување бидејќи резултати од ниедна истрага нема.
Ова е класична тортура на учениците, родителите, наставниците и на сите граѓани и мора да престане.
Исто така, го повикувам Министерството за образование да најде начин наставата да продолжи и да се зафати сериозно со овој проблем бидејќи системот за онлајн настава не функционираше вчера, а не функцонира и денеска за некои училишта.
Ова е аматеризам на иниституциите што секојднево го гледаме и ни се случува.
Во име на родителите ве замолувам и барам да ставите крај на овој хаос!
ИЗВОР: skopjeinfo.mk
