Возачот на Ред Бул, Макс Верстапен одговори на критиките од возачот на Мерцедес, Џорџ Расел, кој неговите постапки на Шпанското ГП ги нарече неприфатливи.
На неколку круга пред финишот, четирикратниот светски првак во Формула 1, се судри со Британецот, за што доби казна од десет секунди, како и три казнени поени и сега е на чекор од дисквалификација. Верстапен има 11 казнени поени од 12 дозволени.
– Во ред, следниот пат ќе земам марамчиња за него. Тој може да го има своето мислење, а јас моето. И, да бидам искрен, повеќе би сакал да се фокусирам на дискусија за трката, која ни одеше добро додека не дојде безбедносното возило на патеката. Дали ќе разговарам за овој инцидент со Расел? Немам што да кажам, тоа е животот.
По казната, 27-годишниот Холанѓанец се најде на 10. место во поредокот на трката во Барселона.
На шпанското Гран при победи возачот на Мекларен, Оскар Пјастри. Неговиот тимски колега Ландо Норис беше втор. Шарл Леклер од Ферари беше трет.
Извор: kurir.mk
