Во сабота, на 31 мај, неколку скопски населби ќе се соочат со делумен прекин на водоснабдувањето, информира ЈП „Водовод и Канализација“ – Скопје. Причина за прекинот е приклучувањето на нов магистрален водоводен цевковод, што е дел од поголем проект за унапредување на водоснабдителниот систем во главниот град.
Без вода, од раните утрински часови, ќе бидат Визбегово, бул. „Босна и Херцеговина“, Чаир, Топанско Поле, Автокоманда, високата зона на Железара и дел од Бутел 1.
„Работите ќе започнат точно на полноќ и се очекува да завршат во рок од 15 часа. Се работи за комплексна интервенција, која вклучува инсталација на игличест регулационен вентил и поврзување на два главни магистрални цевководи во Скопје,“ соопштија од претпријатието.
Со реализацијата на овој проект, се предвидува значително подобрување на притисокот на водата, намалување на загубите и обезбедување поквалитетно водоснабдување за жителите. Новата врска ќе овозможи создавање на циркуларен прстен кој ќе ја зголеми сигурноста на мрежата.
ЈП „Водовод и Канализација“ апелира до граѓаните за разбирање и најавува дека сите активности ќе бидат изведени во најкус можен рок, со цел што побрзо нормализирање на водоснабдувањето.
Извор: 24vesti.mk
