ИСТАНБУЛ (АА) – Парламентот на Данска усвои контроверзен закон со кој возраста за пензионирање ќе се зголеми на 70 години до 2040 година, што ќе ја направи највисока во Европа, јавува Анадолу.
Според данската јавна радиотелевизија ДР, законот е изгласан во третото читање вчера, со 81 глас „за“ и 21 „против“, од вкупно 102 присутни пратеници.
Новата легислатива ќе се однесува на сите лица родени на или по 1 јануари 1971 година.
Мерката се заснова врз долгорочна политика воспоставена со Договорот за благосостојба од 2006 година, кој ја поврзува возраста за пензионирање со зголемениот животен век.
Според овој модел, возраста за пензионирање ќе се зголеми на 68 години во 2030, на 69 години во 2035 и ќе достигне 70 години во 2040 година.
И покрај мнозинската поддршка во Парламентот, законот се соочува со остри критики од работниците, синдикатите и дури и од делови од владејачката Социјалдемократска партија.
Неколку социјалдемократски градоначалници ја повикаа премиерката Мете Фредериксен да го запре натамошното зголемување на старосната граница.
„Мислам дека 70 години е максимална граница. Понатаму не смее да се зголемува, туку треба да ја намалиме“, изјави градоначалникот на Хорсенс, Петер Соренсен.
Фредериксен претходно сигнализираше дека ова ќе биде последен пат нејзината партија да поддржи зголемување, но не исклучи натамошни приспособувања.
Според Индексот за подобар живот на ОЕЦД, просечната животна возраст во Данска изнесува 81,5 години.
Извор: Anadolu Agency (AA)
