Обвинителството проверува како директорот на АНБ, Бојан Христовски станал асистент на Факултетот за безбедност, дознава ТВ 24 од доброупатен извор. Според информациите, до факултетот пристигнал допис, со кој се бара целосната документација за неговиот избор.
Кратко по изборот, Христовски ја смени работата со онаа во тајната полиција, но постапката стана контроверзна, поради лажниот ТОЕФЛ сертификат со кој конкурирал за директорската позиција. Од Обвинителството за ТВ24 денеска кусо одговараат: „Се преземаат дејствија, нема ништо ново од последната изјава на обвинителот минатата недела“.
Во меѓувреме, партијата Левица тврди дека Владата планира да го исфрли условот за сертификат за познавање Англиски јазик при конкурурање на функција. Од партијата обвинуваат дека Владата го користи случајот Христовски за системски да ги намали стандардите. Според нив, со последната одлука, се укинува задолжителниот меѓународен сертификат за познавање јазик кај директорите на институции и се заменува со обична потврда, без верификувана вредност. Велат, ова е легализација на неписменоста, по мерка на партиската елита.
Своја реакција за ова денеска имаше и СДСМ. Од таму предупредуваат дека укинувањето на меѓународните сертификати е чекор назад, што ќе ја загрози стручноста и ќе отвори простор за партиски вработувања.
„Ова ги затвора вратите и за независните стручни и компетентни професионалци во областите кои напредувале само со знаење и резултати. Овие одлуки на владата не можат да ја намалат тежината на серијата скандали со фалсификувани сертификати, како оној на Христиовски во АНБ кои треба што поскоро да се расчистат и да следува одговорност.“
Иако денеска побаравме став, од Владата не одговорија дали случајот со Христовски е причината за предложените измени во законот. Истрагата против директорот на АНБ, Бојан Христовски почна лани, по анонимна пријава за сомнителен ТОЕФЛ сертификат од бугарско школо без овластување. Бугарското обвинителство минатиот месец испрати одговор до Скопје, по што случајот се забрза.
Иако истрагата не е завршена, Антикорупциска го затвори предметот, оценувајќи дека документите му се во ред. Четири месеци подоцна, претседателката на комисијата Татјана Димитровска стана осомничена за оддавање службени тајни.
Извор: 24vesti.mk
