Молчешкум, со насолзени очи, но со високо кренати фотографии од своите загинати чеда, мајките од Кочани чии деца настрадаа во пожарот во дискотеката „Пулс“ и денес побараа правда за трагичниот случај што ја потресе македонската, но и светската јавност.
„Инспекциите спиеле, децата не се разбудија“„Бараме правда“, „Не чекајте твоето дете да биде следно“,се дел од пораките кои семејствата на загинатите ги упатија кон надлежните пред полициската станица, општината и пред судот во Кочани, јасно порачувајќи дека продолжуваат да бараат праведна и неселективна истрага.
На денешниот, петти по ред протестен марш за ангелите семејствата и блиските на трагично загинатите уште еднаш посочија дека се свесни за корупцијата и криминалните дејства кои се случувале во дискотеката на смртта. Татко на загинато момче од Кочани ги повика родителите да не молчат повеќе туку да зборуваат бидејќи, како што рече „убијците ни ги зедоа децата, а не Господ“.
Во однос на истрагата, која сè уште е во тек, Јавното обвинителство најави дека истата ќе заврши во законски предвидениот рок од 90 дена, односно најдоцна до 17 јуни. Во постапката за случајот според министерот за внатрешни работи, досега има над 60 осомничени лица.
Семејствата на жртвите остануваат на ставот дека бараат независна, темелна и неселективна истрага и најавија дека доколку не ја добијат правдата во земјава, тогаш ќе ја бараат пред Меѓународниот суд за човекови права во Стразбур.
Прошка нема, но правда мора да има, ова беше напишано на еден од транспарентите на денешниот петти по ред протестен марш за ангелите, кој заврши токму овде пред Основното јавно обвинителство во Кочани.
Инаку, семејствата на трагично загинатите денес ја одбија поканата да се сретнат со премиерот Мицкоски на 13 мај, а причината за одбивањето, според соопштението, е доцнењето на поканата бидејќи тие претходно побарале средбата да се одржи во Кочани затоа што сметале дека тоа е разумно и оправдано, особено што дел од родителите не се во можност да патуваат поради последиците од најголемата трагедија со 62 загубени млади животи.
Извор: 24vesti.mk
