Амбасадорот на Република Албанија во Скопје, Денион Меидани, го заборава дипломатскиот протокол и си игра со оган во матните води на внатрешната политика на Северна Македонија, пишува БЛИЦ.МК
Наместо достоинствено да ја претставува албанската држава и да го зачува задолжителниот неутралитет, амбасадорот Меидани презема невиден чекор, лајкнува објава на Арбен Таравари, со која тој го иронизира актуелниот владин албански коалиционен партнер во владата на Република Северна Македонија – ВЛЕН.
Објавата на Таравари, во која пишува: „Реакција? Не ВРЕДИ!“ е јасна политичка стрела, но поважно од нејзината содржина е јавната реакција на еден дипломат кој претставува друга држава, Албанија во земја каде што Албанците се државотворен фактор и каде што вакви ставови може лесно да се протолкуваат како мешање во внатрешните прашања.
Дали ова е личен став или сигнал за нова политичка насока на официјална Тирана? Тоа останува да се разјасни. Но, едно е сигурно: Амбасадорот не е политички аналитичар, ниту партиски активист, тој е претставник на Претседателот и Владата на Република Албанија во суверена држава.
Дали министерот за надворешни работи на РСМ треба да го повика амбасадорот Меидани на официјален разговор? Молкот пред ваков потег значи нормализација на дипломатското мешање во внатрешнополитичките дебати. Тоа не е само опасен преседан, туку и навреда за државата домаќин и за албанската заедница која заслужува достоинствена, а не инструментализирана претстава од надвор.
Наместо да биде мост на соработка меѓу двете држави, амбасадорот се претвора во гласноговорник на еднострани симпатии. Неговата улога не е да се меша во дневната политика, туку да гради мостови, да остане неутрален и да ја зајакнува соработката меѓу двете држави во духот на заемна почит и суверенитет.
Амбасадорот не е „фејсбук инфлуенсер“, тој е претставник на една држава, и тоа носи одговорност.
