Антикорупциската комисија институција создадена да се бори против корупцијата, сега самата под лупа. Претседателката осомничена за оддавање службена тајна, а довербата во Комисијата сериозно разнишана. Експертите согласни, ДКСК мора да биде чиста.
По случајот со Димитровска очекуваат да падне довербата на институцијата.
– ДКСК во претходниот состав успеа да исплива некако и заедно со Државниот завод за ревизија беа едни од најценетите институции. Сега најверојатно овој случај ќе ја намали довербата повторно, за жал. Бидејки треба да бидат на браникот на борбата против корупцијата. Второто е личниот пример. Бидејки на крајот, институциите ги прават луѓето кои се во нив и ако таму нема елементаре интегритет, секако дека не може да се очекува реална борба против корупцијата. – Александар Кржаловски МЦМС.
Кржаловски во емисијата Трилинг, вели, дека пропустот е уште во самиот избор на нова Комисија. Порача дека Платформата за борба против корупцијата, уште за време на изборот на нова Комисија, укажала на аномалии во процесот, односно партиски договор во изборот на дел од членовите.
А екс претседателката на ДКСК, Билјана Ивановска, очекува оставка од Димитровска. Вели – обвинителството јасно и чисто да си ја заврши работата до крај, доколку е невина, да докаже.
– Било или не било штом паднал таков сомнеж, пак ќе речам, обвинителството не за џабе дава таква забрана ги зема патните исправи, мерката е силна. Кога веќе паѓа таков сомнеж, треба од морален аспект да си поднесе оставка. Ако нешто треба да имаат членовите на ДСКС, тоа се моралните вредности.- Билјана Ивановска екс претседател на ДКСК.
Претседателката, пак, не гледа причина за оставка. Вчера изјави дека верува во правдата и дека треба да се почека исходот од постапката. Јавноста се прашува – кој ќе ја чува антикорупциската, ако токму таа изгуби доверба? Од институција која треба да биде симбол на интегритет, до сомнежи и барања за оставка, Комисијата сега се соочува со својот најголем тест.
Извор: 24vesti.mk
