ДЕЛА СО ФОКУС НА ПРИРОДАТА ОД КОЛЕКЦИЈАТА НА МСУ СКОПЈЕ УТРЕ ЌЕ СЕ ИЗЛОЖАТ ВО МУЗЕЈОТ МЕТЕЛКОВА ВО ЉУБЉАНА

Изложбата „Ткаење светови: Колекции во разговор“ со  дела од 87 автори од колекцијата на Музејот на современата уметност во Скопје (МСУ Скопје) ќе се отвори утре  (24 април) во 20 часот, во Модерна галерија + Музеј на современа уметност Метелкова во Љубљана, Словенија.

Во „Ткаење светови: Две колекции во разговор“ се вклучени дела од 87 автори, од кои најмногу дела од Македонија и од речиси сите поранешни југословенски републики, дополнети со дела од уметници од Бразил, Полска, Боливија, Судан, Уругвај, Албанија, Јапонија, Јужноафриканска Република, Иран, Куба, Шпанија и од Романија.

Изложбата ги истакнува делата изработени од природни материјали, како и дела кои го одразуваат ангажманот на уметниците со природата.

Куратори на изложбата се Ивана Васева, Благоја Варошанец, Ива Димовски и Владимир Јанчевски од МСУ и Бојана Пишкур од Модерна галерија.

Делата во Љубљана ќе бидат изложени десет месеци, до 8 февруари 2026. Изложбата е дел од програмата од национален интерес на Министерството за култура и туризам на Македонија и конципирана е како реципроцитетна. Дела од колекцијата на словенечкиот музеј наесен ќе бидат изложени во МСУ – Скопје.