Премиерот Христијан Мицкоски повторно ги критикуваше обвинителите и судиите. На дебата посветена на реформската агенда усогласена со Европската Унија, тој истакна дека не може да има европско општество ако обвинителот бира по кого ќе отвори предмет, а по кого ќе премолчи, додека Судот носи пресуди по избор на политички центри, а не по закон.
„Уште позагрижувачки е што институциите кои треба да се борат против корупцијата – обвинителството и судството – често пати се неми, неефикасни или пак, под политичко влијание. Реформите во правосудниот сектор се најитни. Без нив, сите други реформи се безвредни“, изјави премиерот Христијан Мицкоски.
Во фокус се реформските закони од правосудството, чиј рок беше поставен за јуни годинава. Министерот за европски прашања Орхан Муртезани ги потенцираше Законите за Јавното обвинителство и Судскиот совет, но оцени дека динамиката за одредени закони треба да се забрза за да се запазат и роковите од агендата. Во спротивно, надежта за законите од правосудството е во 12-те месеци грејс период.
„Реформите таму бараат поголем општествен консензус, а тоа значи поголемо време за да се усогласат. Тоа не значи дека се доцни поради недоволна координација, туку тие процеси по природа апсорбираат повеќе време“, изјави министерот за европски прашања, Охран Муртезани.
Шведската амбасадорка Ами Ларсон Јаин потсети дека преку Планот за раст на Македонија и стојат на располагање над 700 милиони евра, ако ги исполнува реформите.
„Планот за раст на Европската Унија за Западен Балкан претставува моќен показател за стремежот кон помагање на Македонија од Европската Унија“, изјави Ами Ларсон Јаин, амбасадорка на Шведска.
Министерот за правда Игор Филков за минатата недела најави прес-конференција на која требаше да појаснува до каде се законите од правосудството, но пресот беше одложен. Неговата работа беше мета на критики и од страна на пратеникот Антонијо Милошоски, според кого Филков има слаби перформанси и законите веќе требало да бидат во собраниска процедура.
ИЗВОР: ТВ 21
