Во пресрет на велигденските празници, Агенцијата за храна и ветеринарство (АХВ) спроведе 617 вонредни контроли низ продавници, мали маркети, производствени капацитети и угостителски објекти низ земјава. Целта беше јасна: засилена контрола на хигиената, безбедноста на храната и усогласеноста со законските регулативи.
Резултатите, сепак, отворија сериозни прашања.
Кај 16 оператори биле утврдени значајни недостатоци во хигиенските услови и техничката опременост на просториите. Во четири случаи, вработените немале валидни санитарни книшки или воопшто не биле подложени на задолжителни здравствени прегледи – што директно го крши Законот за безбедност на храна.
Пет субјекти воопшто не биле регистрирани како оператори со храна, што значи дека незаконски функционирале надвор од системот за безбедност. Во дополнителни осум случаи биле откриени производи со несоодветно или погрешно означување – практика што ги доведува потрошувачите во заблуда, а во некои случаи и во ризик.
На терен биле издадени 44 решенија за отстранување на недоследностите. За посериозните прекршувања – пуштање во промет на небезбедна храна или сериозни хигиенски пропусти – изречени се 30 парични казни во вкупна вредност од над 25.000 евра.
Дополнително, уништени се 1.740 килограми небезбедна храна, која, доколку завршела на трпезите, можела да има сериозни последици врз здравјето на граѓаните.
ИЗВОР: racin.mk
