Со премиерата на операта „Риголето“ од Џузепе Верди, на 9 мај ќе се отвори 53. издание на Мајските оперски вечери во Националната опера и балет (НОБ). Диригентот и режисерот се од Италија, маестро Џанлука Мартиненги и Пјер Маестрини. Насловната улога ќе ја пее Марко Карија од Италија, а улогата на Џилда оперската певица Ана Дурловски.
„Напишана според драмата на Виктор Иго ‘Кралот се забавува’, ‘Риголето’ како опера е раскажана со возбудлив музички јазик и нејзиниот успех низ историјата не се должи само на либретото, на трагичната судбина на насловниот лик, туку уште повеќе на прекрасните арии и воопшто, на убавата мелодиска структура“, велат од НОБ.
Во екипата се и Марио Баг (Јужна Кореја), Игор Дурловски, Николина Јаневска, Владимир Саздовски/Борко Биџовски, Драган Ампов, Јане Дунимаглоски и Александра Лазаровска-Василески. Сценографијата е на Гилермо Нова од Шпанија, костимите на Кристина Ачети од Италија, а кореографијата на Саша Евтимова.
До 31 мај, на Мајските оперски вечери ќе се изведат и „Лебедово езеро“ (15 мај), „Набуко“ (19 мај), „Мадам Батерфлај“ (23 мај) и „Турандот“ (27 мај), а затворањето традиционално е со „Аида“.
ИЗВОР: sdk.mk
