Опозициските партии продолжија да реагираат за начинот на кој се проширува и развива истрагата за трагедијата во Кочани. Од ДУИ пишуваат дека власта наместо да преземе брзи и одлучни мерки и да бара одговорност од вистинските виновници, избра да ја избегне одговорноста на актуелните функционери и создава непотребни меѓуетнички тензии.
„Мицкоски со неосновано апсење на албанци се обидува да предизвика меѓуетнички тензии, како параван за неуспесите на владата и како алатка за предизвикување етнички раздор. ДУИ најостро ги осудува неодамнешните апсења на поединци кои немаат врска со трагедијата, како средство за оттргнување на вниманието од вистинските виновници. Овие постапки без докази покренати од институциите на Мицкоски, служат за насочено таргетирање на поединци за политички цели“, вели ДУИ.
Алијансата за Албанците, дел од Европскиот фронт, пишува дека кампањата против Албанците која ја најави самиот премиер Христијан Мицкоски дека „ќе ги фатиме за уши“ и ќе ги пратиме во затвор, сега во пракса ја спроведуваат Обвинителството и МВР. Според АА, неправедните, неосновани и чисто етнички мотивирани апсења, со злоупотреба на кочанската трагедија, имаат две цели:
„Да се сокријат вистинските одговорни, почнувајќи од премиерот, министерот за внатрешни работи и актуелните раководители на надлежните, локални и централни органи. Да се заплашуваат Албанците, да се угнетуваат Албанците и да се предизвикуваат револт и меѓуетнички тензии, со цел дефокусирање од реалните проблеми и одговорности“, велат од АА и ЕФ.
Реагираше и опозициската СДСМ која пишува дека проширувањето на истрагата за трагедијата сè уште е насочено само кон минатото, а не на моментите кога се случил настанот ниту на сегашните полициски функционери. Според нив, меѓу главните прашања на кои истрагата сè уште нема одговор е „кој ќе одговара за безбедносните пропусти, за кои директно се одговорни МВР и Службите за јавна безбедност?
„Фактите говорат дека овие институции под директна надлежност на МВР не постапиле соодветно за време на кривично-правниот настан и непосредно пред него. Не само што не изготвиле безбедносен план и не направиле проценка на ризик, полицијата била на лице место кобната ноќ во диското – видела малолетници, пиротехника, непријавен настан, клуб без лиценца – и не презела ништо“, велат од СДСМ.
Повикот на опозициските партии е истрагата да биде транспарентна и заснована на докази со што ќе се гарантира изведување пред лицето на правдата на оние кои се одговорни.
ИЗВОР: ТВ 21
