Поранешните министри за економија Ваљон Сарачини и Беким Незири добија мерка куќен притвор, додека поранешниот директор на Дирекцијата за заштита и спасување и актуелен министер без ресор, Шабан Салиу, доби ефективен притвор. Овие мерки се дел од новата фаза на истрагата за трагичниот пожар во дискотеката во Кочани, по нејзиното проширување на нови осомничени лица.
Покрај Салиу, уште три други лица добиле ефективен притвор, но од Обвинителството засега не се откриваат нивните имиња ниту функциите што ги извршувале. Освен Сарачини и Незири, уште четири други лица се со одредена мерка куќен притвор, додека останатите осум осомничени лица се со мерки на претпазливост, пред сè поради опасност од бегство.
Во истрагата е опфатен и актуелниот амбасадор на Македонија во Норвешка и Исланд, Дритон Куќи, кој исто така е поранешен министер за економија. Иако против него сè уште не се преземени мерки, Куќи најави дека доброволно ќе се врати во земјата по добивањето на статус на осомничен.
Министерот за внатрешни работи, Панче Тошковски, потврди дека се очекува амбасадорот Куќи во најскоро време да се стави на располагање на институциите во Македонија. „Согласно тоа што го кажа лицето кое го споменавте, очекуваме дека за кратко време ќе биде достапно на институциите во Македонија“, изјави Тошковски.
Истражните органи водат постапка против вкупно 47 физички и три правни лица. Меѓу нив, под истрага се и седум полициски службеници. „Се преземаат сите потребни истражни дејствија“, соопшти обвинителот Љубомир Коцевски.
ИЗВОР: racin.mk
