ВАШИНГТОН (АА) – Американскиот претседател Доналд Трамп најави дека наскоро ќе воведе голема царина на фармацевтските производи, со цел производството на лекови повторно да се врати во САД, јавува Анадолу.
„Многу брзо ќе воведеме голема царина на фармацевтските производи“, изјави Трамп во своето обраќање на вечерата организирана од Националниот републикански конгресен комитет.
„Откако ќе го направиме тоа, тие ќе се вратат назад во нашата земја, затоа што ние сме голем пазар. Тоа е нашата предност – ние сме најголемиот пазар“, нагласи тој.
Трамп додаде дека производителите на лекови ќе ги напуштат Кина и другите држави бидејќи најголемиот дел од нивните производи се продаваат токму во САД.
Тој ги обвини претходните влади дека ѝ дозволиле на Кина да ги искористува САД преку неправедни трговски практики, ветувајќи дека тоа нема да се повтори под негово раководство.
Трамп ја обвини Кина дека воведува „неоправдани“ царини. Според него, многу земји се збогатиле токму благодарение на царините, но неговите постапки сега наидуваат на неправедна критика.
„Сите се збогатија поради царините. А сега, кога ние го правиме тоа – било многу страшно. Она што Трамп го прави е страшно. Тие се збогатија, и не само Кина. И други земји – погледнете го Виетнам, можам да набројам 50 држави“, изјави Трамп.
Тој соопшти и дека нова царина од 104 отсто на кинеските производи ќе стапи на сила на полноќ и ќе остане во сила сè додека Пекинг не прифати нов трговски договор.
„Мислам дека на крајот ќе склучат договор“, рече Трамп и додаде: „Кина ќе го направи тоа, тие сакаат да склучат договор.“
Извор: Anadolu Agency (AA)
