ЕРУСАЛИМ / АНКАРА (АА) – Најмалку 1.700 милионери го напуштиле Израел во текот на 2024 година поради влошените економски услови како последица од војната во Газа, објавија израелски медиуми денес, јавува Анадолу.
Според податоците на британската компанија за миграциски услуги „Хенли и партнерс“ и јужноафриканската фирма за анализи „Ново светско богатство“, бројот на милионери во централниот дел на Израел, особено во Тел Авив и Херцлија, паднал од 24.300 во 2023 година на 22.600 во 2024 година.
„Ова значи дека Израел го напуштиле најмалку 1.700 милионери во текот на изминатата година“, наведуваат од „Хенли и партнерс“.
Иако извештајот не наведува конкретни причини за нивното заминување, израелските медиуми претходно посочија дека голем број Израелци ја напуштиле земјата поради војната во Газа и нејзиното влијание врз економијата и безбедносната ситуација.
Во 2023 година, меѓународната агенција за кредитен рејтинг „Фич“ го намали кредитниот рејтинг на Израел од A+ на A.
Од почетокот на израелската офанзива во октомври 2023 година досега во Газа се убиени над 50.800 Палестинци, повеќето жени и деца.
Во ноември Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант поради воени злосторства и злосторства против човештвото во Газа.
Израел се соочува и со тужба за геноцид пред Меѓународниот суд на правдата поради војната против енклавата.
Извор: Anadolu Agency (AA)
