Десет патнички возила денеска се одземени од страна на полицијата поради учество во таканаречени диви трки и предизвикување голема бучава на булеварот „Трета македонска бригада“ во Скопје, соопшти Министерството за внатрешни работи.
„Денеска во СВР Скопје било пријавено дека на бул. ‘Трета македонска бригада’, се одвиваат т.н. диви трки со патнички моторни возила кои предизвикуваат голема бучава,“ информираат од МВР.
По добиената пријава, реагирале полициските службеници од Одделението за безбедност на патниот сообраќај при СВР Скопје. Во акцијата се сопрени десет возила кои, според полицијата, се сомнителни за техничка неисправност.
„Истите ќе бидат однесени во станица за технички преглед каде од страна на стручни лица ќе се утврди дали возилата се технички исправни и дали ги исполнуваат условите за учество во сообраќајот,“ се наведува во соопштението.
ИЗВОР: racin.mk
