ЊУ ДЕЛХИ (AA) – Индиските безбедносни сили, вклучително и припадниците на Силите за брза интервенција, беа распоредени околу месџидот Џама во главниот град Њу Делхи пред петочната молитва, јавува Анадолу.
Зајакнатите безбедносни мерки следуваа по долгоочекуваното усвојување на предлог-законот за Одборот за вакаф од 2025 година, кој неодамна беше одобрен од двата дома на Парламентот.
Главната индиска опозициска Конгресна партија денес порача дека ќе го оспори пред Врховниот суд неодамна усвоениот предлог-закон кој ги ревидира законите што гo регулираат вакафот и што беше поздравен од премиерот Нарендра Моди како главна пресвртница за реформи и транспарентност.
Контроверзниот предлог-закон, кој се однесува на вакафот, земјиште или имот дониран од муслиманите за религиозни, образовни или добротворни цели, помина во двата дома на Парламентот и покрај остриот отпор од опозициските партии и муслиманските организации.
Претходно денес, предлог-законот е усвоен од Горниот дом Раџа Саба, откако беше претставен од Владата предводена од Моди во услови на зголемено политичко и општествено противење.
Високиот лидер на Конгресната партија, Џајрам Рамеш, потврди дека партијата „многу наскоро ќе ја оспори во Врховниот суд уставноста на предлог-законот за вакафот од 2024 година.
Неговите коментари дојдоа откако претседателот на Конгресната партија, Маликарџун Карге, го осуди предлог-законот, велејќи дека е воведен за да „ги малтретира малцинствата“. Карге го критикуваше начинот на неговото донесување, истакнувајќи дека за време на гласањето во Долниот дом, или Лок Сабха, 288 пратеници го поддржале, додека 232 биле против.
Законодавството наиде на силна осуда од муслиманските граѓански здруженија. Џемаат-е-Ислами Хинд го нарече предлог-законот „директен напад врз верските слободи и уставните права“.
„Усвојувањето е за голема осуда“, рече претседателот на групата, Саид Садатула Хусаини, во изјавата, обвинувајќи ја Владата за поткопување на правата на малцинските заедници.
Сепак, Моди и членовите на неговата владејачка партија Бхаратија Џаната (БЈП) го правдаа законот како потег кон поголема транспарентност и правичност.
На X, Моди напиша дека усвојувањето на законот означило „одлучен момент во нашата колективна потрага по социоекономска правда, транспарентност и инклузивен раст“.
„Ова особено ќе им помогне на оние кои долго време останаа на маргините, на оние со ускратен глас и можности“, рече тој, додавајќи дека вакафскиот систем со децении немал „транспарентност и непристрасност“.
„Сега ќе влеземе во ера во која рамката ќе биде помодерна и почувствителна на социјалната правда“, додаде Моди. „Остануваме посветени во давањето приоритет на достоинството на секој граѓанин. На овој начин градиме посилна, поинклузивна и посочувствителна Индија“.
Извор: Anadolu Agency (AA)
