Земјотрес во Мјанмар со јачина од 7,7 степени, се бројат жртви

Страотен земјотрес во Мјанмар. Нешто по 6 часот утрово, силен потрес со јачина од 7.7 степени според Рихтеровата скала ги разбуди жителите на југоисточна Азија.

Епицентарот е во Мјанмар, во близина на градот Мандалеј, на длабочина од 10 километри..12 минути после првиот земјотрес, следел уште еден, со јачина од 6.4 степени. Потресите биле почуствувани и во соседните држави но и во југозападна Кина, одалечена стотици километри. Урнати згради, болници, патишта и мостови, нема официјален број на загинати во Мјанмар, но се стравува дека конечниот епилог ќе биде неколку стотици.

Потрагата по преживеани и заглавени под урнатините се уште трае. Во шест региони низ земјата прогласена е вонредна состојба, воената хунта која владее со државата од 2021-ва година нареди итна крводарителска акција поради големиот број на повредени а побарана е и меѓународна помош.

„Колку што сум запознаен, епицентарот е во Сагаинг. Можно е таму да има повеќе загинати бидејќи жртви се пријавени и на други места. Поради тоа донесена е одлука да се прогласи вонредна состојба.“ – Зав Мин Тун портпарол на Воената хунта во Мјанмар.

Десетици повредени лежат пред одделот за итни случаи во главниот град. Објектот е оштетен од земјотресот, а влезот за итни случаи, целосно е урнат. 

Вонредна состојба прогласена и во Банкок. Премиерката на Тајланд нареди вонредни мерки за главниот град, каде се урна 30-катна зграда а десетици објекти се оштетени. Според последните информации, тројца се починати, а 90 лица се водат како исчезнати. Железничкиот сообраќај низ земјата е во прекин а во некои делови од Тајланд во прекин е и патниот сообраќај.

„Првин не сфатив што се случува а потоа видов како се тресат масата и компјутерот. Кога се слушна како пукаат ѕидовите и прозорците, бев сигурен дека е земјотрес. Се урна и дел од таванот.“ – Вариниоу Армартајакул жител на Бангкок.

„Проверував порака на мојот мобилен телефон. Бев во мојата фотелја и одеднаш се почна да се движи напред-назад. А потоа се превртев и ја удрив главата од маса.“ – Дебора Панмачет жителка на Бангкок.

Мјанмар е во криза откако со државен удар, воената хунта ја презеде власта во 2021 година. Оттогаш трае и конфликтот меѓу владејачкиот режим и бунтовниците. Откако дојде на власт, а особено откако започна војната, владата ја ограничи работата на медиумите, го забрани пристапот до голем број на интернет страници, и ги блокираше социјалните медиуми.