Водата во Крива Река претставува сериозна закана за здравјето на граѓаните по хаваријата што се случила во рудникот Ораница. Според градоначалникот на Крива Паланка, Сашко Митовски, анализите покажале драстично зголемено присуство на штетни метали, особено олово.
„Наодите од акредитирана лабораторија потврдуваат дека водата во Крива Река е сериозно загадена и директно го загрозува животот и здравјето на луѓето. Според резултатите, концентрациите на штетни материи се драматично зголемени, а најалармантен е десеткратниот пораст на олово во водата“, изјави Митовски.
Градоначалникот најави поднесување кривична пријава против одговорните и ја обвини концесионерската компанија за еколошката катастрофа. Истовремено, тој посочи дека Државниот инспекторат не презел соодветни мерки согласно законските обврски.
Дополнително, Митовски предупреди дека последиците од ова загадување може да бидат уште поголеми, бидејќи контаминацијата се шири и на почвата по течението на реката, што го загрозува земјоделското производство во регионот.
„Проблемот не е само во водата – загрозени се и обработливите површини, земјоделските култури и целиот екосистем во околината“, нагласи тој, повикувајќи ги надлежните институции и Јавното обвинителство да преземат итни мерки.
ИЗВОР: racin.mk
