Барселона ја очекува голем предизвик во Лигата на шампионите, гостувањето кај Пари Сен Жермен во третото коло од главната фаза. Каталонскиот тим пристигнува во Париз во одлична форма, со 11 победи на исто толку натпревари од почетокот на сезоната, а тренерот Ханси Флик верува дека неговите фудбалери се подготвени за дуелот со актуелниот европски шампион.
Натпреварот ќе се одигра утревечер на „Паркот на принцовите“, а германскиот стратег очекува тежок тест против екипа која во последните две години покажа дека е меѓу најдобрите во светот.
„ПСЖ израсна како тим во последните години. Она што го постигна е импресивно. На последниот натпревар успеа да направи пресврт за само неколку минути, што покажува колкав квалитет поседува. Имаат фантастични фудбалери и на клупата“, изјави Флик.
Тренерот на Барселона нагласи дека неговиот тим со самодоверба го очекува дуелот и дека минатогодишниот пораз од парижаните не влијае врз подготовките за новата пресметка.
„Оваа сезона од самиот почеток играме онака како што сакаме. Имаме самодоверба и ја контролираме топката. Подготвени сме и ова е одлична можност да покажеме колку сме добри“, истакна германскиот стручњак.
Флик потврди дека Рафиња ќе биде во стартниот состав, додека во одбраната ќе мора да најде решение поради проблемите со играчкиот кадар. Како можни опции ги посочи Френки де Јонг и младиот Алекс Кампос, а се надева дека Жил Кунде ќе биде подготвен за претстојниот викенд.
„Средниот ред ќе биде многу важен бидејќи двата тима имаат одлични фудбалери во таа зона. Мораме да избегнуваме грешки, затоа што ПСЖ е исклучително прецизен тим и ќе ни биде потребна максимална концентрација“, објасни Флик.
Тој имаше пофални зборови и за тренерот на францускиот тим, Луис Енрике, истакнувајќи го интензитетот во играта, пресингот и тактичката флексибилност на неговата екипа.
„Луис Енрике е еден од најдобрите тренери во светот. Неговиот тим игра фантастичен фудбал, а ми се допаѓа начинот на кој играчите ги менуваат позициите и функционираат во системот“, рече тренерот на Барселона.
Каталонците во Париз ќе се обидат да ја продолжат победничката серија, а за Флик овој натпревар е и можност да стигне до 100-та победа на клупата на Барселона. Германецот е задоволен од формата на своите фудбалери и атмосферата во соблекувалната, верувајќи дека тимот може да одговори на предизвикот против европскиот шампион.
Извор: sportmanija.mk
