ЕРУСАЛИМ (АА) – Израелскиот министер за одбрана, Израел Кац, денеска ѝ нареди на Армијата да заземе повеќе области во Појасот Газа, откако ги протера палестинските жители, известува Анадолу.
Израел во вторникот ја продолжи својата геноцидна војна во Газа, прекршувајќи го јануарскиот договор за прекин на огнот, а израелската јавна телевизија КАН денеска објави дека министерот Кац наредил понатамошна окупација на палестинските области во Газа со образложение за наводна заштита на израелските војници и заедници во близина на Газа.
„Колку повеќе Хамас инсистира да одбие да ги ослободи заложниците, толку повеќе земја ќе изгуби, што ќе биде припоена кон Израел“, се закани Кац.
Тој додаде дека израелската воена операција во Газа ќе ескалира сѐ додека не бидат ослободени сите заложници што ги држи Хамас.
Рано утринава израелската Армија изврши напад врз западните области на Беит Лахија во северниот дел на Појасот Газа, што беше придружен со силно артилериско гранатирање.
Повеќе од 700 Палестинци се убиени, а над 900 се повредени во израелските воздушни напади врз Газа од вторникот, прекршувајќи го договорот за прекин на огнот и размена на затвореници, што беше во сила од 19 јануари.
Речиси 50.000 Палестинци се убиени, главно жени и деца, а повеќе од 112.000 се повредени во израелските напади врз Газа од октомври 2023 година.
Во ноември минатата година, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата.
Извор: Anadolu Agency (AA)
