Наместо во прв ред како до сега, првообвинетиот Љупчо Палевски – Палчо го седнаа на последен ред во судницата поради безбедносни причини. Внимателно го слушаше и запишуваше сведочењето на Велибор Манев, некогашен соработник во грабнување за пари, и убивање. Палчо имал листа со пикирани лица кои требало да бидат грабнати, чувани во длабока дупка кај Велес додека семејството не даде пари за откуп.
Започнале со пензионерот од Велес. Одбран бил бидејќи живеел сам и имал автомобил кој им требал за грабнувањето на 40 годишна жена.
„Палчо веднаш му испука куршум во слепоочницата. Јас останав без зборови, скокнав од местото и излегов надвор од шумичката. Застанав и бев пред колабирање. Се тресев од тоа што го видов. Палчо видов како го турна Панче во дупката. Го прашав зошто го направи тоа, ми рече да не се мешам и да не се секирам, а и да не ми го расипува убавото семејство кое го имам“, порача Велибор Манев.
На списокот за киднапирање биле главно имотни лица и бизнисмени. Манев во судница со име посочи некои од нив. Обвинетите требало да добијат награда од 150 илјади евра за својата улога во криминалните активности.
„Се одлучи за 40 годишна жена. Ја следеше десетина дена и постојано ни покажуваше фотографии. Знаевме кое време излегува и каде оди. Не знам дали фотографиите беа фотошопирани. По три неуспешни обиди, ја грабнавме. Кога ја однесовме кај местото викано Бразди сфативме дека е дете. Му реков на Палчо да го ослободиме бидејќи тоа е погрешна личност, но тој ја сликаше и рече дека нема грешка. Сликите ќе ги праќаше на родителите за да бара пари и ни рече дека сумата како награда ќе биде помала. Се свртев кон лозјата, а тој преку перниче ја уби. Па ни даде копач и нареди да ја закопаме“, вели Велибор Манев.
На овој дел од сведочењето, судијата даде пауза бидејќи му се слоши на обвинетиот Александар Ѓорчевски, татко на Вања.
Манев негираше дека Ѓорчевски бил вмешан, тврдејќи дека го посочил под притисок од полицијата за да престане тортурата врз него.
Поради разликите во исказите, Обвинителството побара во судница да се прочитаат двете претходни изјави на Манев дадени во полиција и обвинителство. Обвинителката Ана Стојковиќ-Димитровска, читајќи ги, не можеше да ги сокрие емоциите кои ја надвладеаа во неколку моменти.
ИЗВОР: ТВ 21
