Социјалдемократите итно бараат ВМРО ДПМНЕ да каже кој од Белата палата се јавил за да има куќен притвор за Асмир Пуцко Петрол?
„ДПМНЕ наместо да си ја ишка мувата на капата треба да одговори дали откако бил поднесен предлог за притвор по интервенција од Белата палата следувало препавање на решението во куќен притвор? Зошто надлежните судови досега не го преиначиле ова решение за куќен притвор иако имаат надлежност за тоа?Или ДПМНЕ е над сите закони и судови и што ќе каже белата палата тоа е“, посочуваат од СДСМ.
Според нив јасно е дека куќниот притвор за осомничениот Асмир Јахоски, од Пуцко Петрол е резултат на старо-новата коалиција на ДПМНЕ и ДУИ која според нив, функционира одлично.
„Коалицијата ДУИ и ДПМНЕ го пушти и Артан Груби да избега преку граница и да биде недостапен за правдата. Поминаа цели 3 месеци власта не презема ништо да го врати. Кога Бојан Стојановски ќе држи прес конференции следен пат нека одговори што и должи ДПМНЕ на ДУИ. За колкави провизии станува збор“, велат од СДСМ.
Инаку од Обвинителство за гонење на организиран криминал и корупција денеска соопштија дека тие барале притвор за Јахоски, но дека предлогот не бил прифатен од судот.
„Сите овие околности, како што е истакнато во решението, одат во прилог на намален ризик од бегство и во насока на оправданост за определување на поблага мерка за обезбедување на присуство. Така, Судијата на претходна постапка не прифаќајќи го предлогот на обвинителството одлучил на осомничениот да му изрече мерка куќен притвор, а воедно оценил дека се исполнети условите да му биде изречена и мерка на претпазливост – одземање на патна исправа и забрана за издавање на нова патна исправа“, сметаат од ОЈОГОКК.
Претходно од кривичниот суд соопштија дека јавниот обвинител се согласил да се промени мерката во домашен притвор.
„Во однос на осомничениот А.Ј., по произнесување на осомничениот пред судија на претходна постапка Јавниот обвинител се согласи за промена на предлогот за определување мерка притвор со предлог за определување на мерка куќен притвор, што беше прифатено од Судијата на претходна постапка“, посочуваат од Кривичниот суд Скопје.
Асмир Јахоски кој беше меѓу 11-мина приведени од вкупно 13 осомничени за набавка на мазут со сомнителен квалитет и за перење пари е син на пратеникот Исмаил Јахоски од ДУИ. Осомничените се товарат дека набавувале гориво со сомнителен квалитет и го оштетиле државниот буџет за над 167 милиони евра.
ИЗВОР: racin.mk
