АНКАРА/ИСТАНБУЛ (АА) – Туркије денес ја истакна својата силна поддршка за суверенитетот и територијалниот интегритет на Босна и Херцеговина, нагласувајќи дека зачувувањето на мирот и стабилноста во земјата е можно „со разум и воздржаност“, јавува Анадолу.
Во писмено соопштение, турското Министерство за надворешни работи соопшти дека со загриженост ги следи случувањата по пресудата против Милорад Додик, претседателот на Република Српска, една од двете ентитетски единици во Босна и Херцеговина.
„Туркије секогаш ја истакнувала својата силна поддршка за суверенитетот и територијалниот интегритет на Босна и Херцеговина. Зачувувањето на мирот и стабилноста во земјата е возможно само со дејствување со разум и воздржаност“, се наведува во соопштението.
Министерството нагласи дека е важно да се избегнуваат еднострани потези и изјави кои би можеле да ја загрозат стабилноста во земјата и дека решенијата за проблемите треба да се бараат преку дијалог и консензус.
Исто така, беше нагласено дека Туркије ќе продолжи да обезбедува секаква поддршка за мирот и благосостојбата на граѓаните на Босна и Херцеговина, како што го правела тоа и во минатото.
Судот на Босна и Херцеговина го осуди Додик на една година затвор и шестгодишна политичка забрана поради „непочитување на одлуките на Канцеларијата на високиот претставник“.
Извор: Anadolu Agency (AA)
