Македонија бара да увезува осумнаесет типови отпад, деклариран на листата на неопасен отпад од европските земји. Унијата пак ќе ограничува каков отпад може да биде согорен на нејзина територија. Ќе вмеша ли прсти Европската Унија за да му застане на патот на опасниот отпад?
Министерството за животна средина ја доставило листата до Европската комисија, која ќе треба да одлучи дали земјава има капацитет за еколошки безбедно управување со овој отпад.
– По 21 мај 2029 г., земјите кои не се членки на ОЕЦД (Организацијата за економска соработка и развој), а се заинтересирани за увоз на отпад од пластика, ќе бидат поканети да ја известат Европската комисија и да го покажат својот капацитет да управуваат со таков отпад на еколошки здрав начин, со цел да бидат вклучени во листата на земји кои не се членки на ОЕЦД, а во кои отпадот од пластика ќе може да се извезува од ЕУ. Ова барање за увоз на отпад од пластика од ЕУ ќе може да го опфати само неопасниот отпад од пластика (б3011). – МЖСПП.
Од ресорното Министерство дообјаснуваат и дека според новите регулативи на ЕУ, од 2027 година ќе важат построги правила за извоз на неопасен отпад во земји кои не се членки на Организацијата за економска соработка и развој. Меѓутоа, екологистите во земјава со години наназад апелираат за воведување на построги контроли, поради опасноста во земјата да заврши и опасен отпад.
Инаку, последните податоци покажуваат дека Европа создава многу повеќе отпад отколку што рециклира. Според Европската комисија, пет тони отпад годишно создава во просек секој жител на Европа. Само 38 проценти од отпадот се рециклира, а над 60% од отпадот на домаќинствата сè уште завршува на депонии во некои од земјите на ЕУ. Македонија, во друштво со Србија и Босна и Херцеговина се меѓу 24-те земји што ја информирале Европската комисија за подготвеноста да прифаќаат отпадни материјали од Европската Унија.
Извор: 24vesti.mk
